अनिल मुळवाड निगडी प्रतिनिधी दि. ५ जुलै: निगडी प्राधिकरणातील भेळ चौक परिसरात सुरू असलेल्या बांधकामादरम्यान मुसळधार पावसामुळे कंपाउंड भिंतीचा काही भाग कोसळल्याची घटना घडली. या दुर्घटनेत भिंतीखाली दोन कामगार अडकल्याने ते जखमी झाले असून त्यांच्यावर उपचार सुरू आहेत.
मिळालेल्या माहितीनुसार, संबंधित ठिकाणी इमारतीच्या पायाभरणीसाठी मोठ्या प्रमाणावर खोदकाम करण्यात आले होते. सलग पडणाऱ्या पावसामुळे माती खचली आणि त्याचा परिणाम म्हणून कंपाउंड भिंतीचा काही भाग थेट खड्ड्यात कोसळला. यावेळी काम सुरू असल्याने दोन कामगार भिंतीखाली सापडले. स्थानिक नागरिक व बचाव पथकाच्या मदतीने त्यांना तात्काळ बाहेर काढून उपचारासाठी रुग्णालयात दाखल करण्यात आले.
या घटनेनंतर अखिल भारतीय कामगार महासंघाचे अध्यक्ष किशोर हातागळे यांनी कामगार उपआयुक्तांकडे संबंधित बांधकाम व्यावसायिक व जबाबदार अधिकाऱ्यांवर कडक कारवाई करण्याची मागणी केली आहे.
यावेळी बोलताना किशोर हातागळे म्हणाले की, “पावसाळ्यात सुरू असलेल्या बांधकामस्थळी कामगारांच्या सुरक्षेसाठी आवश्यक ती खबरदारी घेणे बंधनकारक आहे. सुरक्षा उपाययोजनांकडे दुर्लक्ष झाल्यास अशा दुर्घटना घडतात. प्रशासन आणि बांधकाम व्यावसायिकांनी कामगारांच्या जीवित सुरक्षेला सर्वोच्च प्राधान्य द्यावे.”
या घटनेमुळे परिसरात काही काळ तणावाचे वातावरण निर्माण झाले होते. संबंधित विभागाकडून दुर्घटनेची चौकशी सुरू करण्यात आली असून पुढील कारवाईची प्रतीक्षा आहे.
