पिंपरी-चिंचवड, प्रतिनिधी : शहरात वाढत्या अमली पदार्थांच्या विळख्याविरोधात पोलिसांनी मोठी कारवाई करत वाकड परिसरातून एका फूड डिलिव्हरी बॉयला एमडी (मॅफेड्रॉन) ड्रग्जची विक्री करताना रंगेहाथ अटक केली आहे. या कारवाईमुळे परिसरात खळबळ उडाली असून तरुण पिढीला लक्ष्य करणाऱ्या ड्रग्ज रॅकेटबाबत गंभीर प्रश्न उपस्थित झाले आहेत.
मिळालेल्या माहितीनुसार, गुरुवारी (१८ जून) रात्री सुमारे ८.४५ वाजण्याच्या सुमारास वाकड पोलिसांनी गुप्त माहितीच्या आधारे सापळा रचून ही कारवाई केली. या प्रकरणी निसार अकबर मुजावर (वय २६, रा. गुजर नगर, थेरगाव, मूळ रा. तुळजापूर, धाराशिव) याला ताब्यात घेण्यात आले आहे. आरोपीविरोधात वाकड पोलीस ठाण्यात गुन्हा दाखल करण्यात आला आहे.
पोलिस तपासात आरोपी फूड डिलिव्हरीचे काम करत असतानाच अमली पदार्थांची विक्री करत असल्याचे समोर आले आहे. त्याच्याकडे ७.६० ग्रॅम वजनाची सुमारे ३८ हजार रुपये किमतीची एमडी पावडर आढळून आली. पोलिसांनी त्याच्याकडून ड्रग्जसह मोबाईल फोन, प्लास्टिक पिशव्या आणि मोपेड दुचाकी असा एकूण सुमारे १ लाख ५८ हजार रुपयांचा मुद्देमाल जप्त केला.
प्राथमिक चौकशीत आरोपी गेल्या पाच ते सहा महिन्यांपासून एमडी ड्रग्जची विक्री करत असल्याची माहिती समोर आली आहे. या अमली पदार्थांचा पुरवठा त्याला कोठून होत होता, तसेच या रॅकेटमध्ये आणखी कोणाचा सहभाग आहे का, याचा शोध पोलीस घेत आहेत.
अमली पदार्थांचे वाढते जाळे ही समाजासाठी चिंतेची बाब बनली असून युवकांना व्यसनाच्या गर्तेत ढकलणाऱ्या अशा प्रवृत्तींवर कठोर कारवाई करण्याची मागणी नागरिकांकडून होत आहे. वाकड पोलीस या प्रकरणाचा अधिक तपास करत आहेत.
