पिंपरी : पिंपरी-चिंचवड महापालिकेच्या सन २०२५-२६ च्या अर्थसंकल्पात बोगस उपसूचनांच्या माध्यमातून तब्बल ६० कोटी १८ लाख रुपयांची बिले ठेकेदारांना परस्पर मंजूर करण्यात आल्याचा आरोप विविध संघटनांनी केला आहे. या आर्थिक गैरव्यवहार प्रकरणात आयुक्त डॉ. विजय सूर्यवंशी यांनी तातडीने फौजदारी गुन्हा दाखल न करता केवळ चौकशी अहवाल राज्य शासनाकडे पाठवून जबाबदारी झटकण्याचा प्रयत्न केल्याचा आरोप आंदोलकांनी केला.
या पार्श्वभूमीवर विविध सामाजिक आणि राजकीय संघटनांनी महापालिका भवनासमोर चक्की आंदोलन करत निषेध व्यक्त केला. आंदोलनात राष्ट्रवादी रिपब्लिकन पक्षाचे अध्यक्ष डॉ. राजेश नागोसे, अल्पसंख्याक विकास महासंघाचे अध्यक्ष रफिक कुरेशी, नवमहाराष्ट्र कामगार आघाडीचे अध्यक्ष सुधाकर इंगळे यांच्यासह अनेक पदाधिकारी व कार्यकर्ते सहभागी झाले होते.
आंदोलकांनी सांगितले की, बोगस १४ उपसूचनांच्या आधारे कोट्यवधी रुपयांची बिले मंजूर करून महापालिकेच्या निधीचा अपहार करण्यात आला आहे. तसेच बनावट कागदपत्रे तयार करून शासनाची फसवणूक करण्याचाही प्रयत्न झाल्याचा आरोप करण्यात आला. या संपूर्ण प्रकरणात संबंधित अधिकारी, कर्मचारी, ठेकेदार आणि त्यांना मदत करणाऱ्या नगरसेवकांवर आर्थिक गैरव्यवहाराचा गुन्हा दाखल करून कठोर कारवाई करावी, अशी मागणी आंदोलनकर्त्यांनी केली.
चौकशी समितीचा अंतिम अहवाल थेट राज्य शासनाकडे पाठविण्याऐवजी दोषींवर तात्काळ कारवाई करणे आवश्यक होते. मात्र, प्रशासनाने त्याकडे दुर्लक्ष केल्याचा आरोप करत विविध संघटनांनी आंदोलन अधिक तीव्र करण्याचा इशारा दिला.
