शस्त्रे, मिरवणुका, भडकावू घोषणा आणि सभा यांवर निर्बंध
पुणे : प्रतिनिधी
पिंपरी-चिंचवड शहरातील कायदा व सुव्यवस्था कायम राखण्यासाठी पोलीस प्रशासनाने महाराष्ट्र पोलीस अधिनियम १९५१ अंतर्गत कलम ३७ (१) व (३) लागू करण्याचा निर्णय घेतला आहे. पोलीस सहआयुक्त डॉ. शशिकांत महावरकर यांनी हा आदेश जारी केला असून तो २७ मे २०२६ रोजी मध्यरात्रीपासून लागू होणार आहे. सदर आदेश ९ जून २०२६ रोजी रात्री १२ वाजेपर्यंत प्रभावी राहणार आहे.
या कालावधीत पिंपरी-चिंचवड पोलीस आयुक्तालयाच्या हद्दीत विविध निर्बंध लागू करण्यात आले असून नागरिकांनी नियमांचे पालन करण्याचे आवाहन प्रशासनाने केले आहे.
आदेशानुसार तलवारी, भाले, काठ्या, दंड, बंदुका तसेच दगडफेक किंवा हल्ल्यासाठी वापरता येतील अशा वस्तू बाळगण्यास बंदी घालण्यात आली आहे. दाहक पदार्थ, स्फोटके किंवा शारीरिक इजा पोहोचवू शकणारी साधने घेऊन फिरण्यासही मनाई करण्यात आली आहे.
तसेच पाचपेक्षा अधिक व्यक्तींनी एकत्र जमणे, पोलीस आयुक्तांची पूर्वपरवानगी न घेता सभा आयोजित करणे किंवा मिरवणुका काढणे यावर निर्बंध लागू करण्यात आले आहेत. सार्वजनिक ठिकाणी मोठ्या आवाजात घोषणा देणे, वाद्य वाजवणे किंवा भडकावू भाषणे करणे यांनाही मनाई करण्यात आली आहे.
शहरातील शांतता आणि सामाजिक सलोखा अबाधित राखण्यासाठी प्रशासनाने विशेष खबरदारी घेतली आहे. कोणत्याही व्यक्तीचे प्रतिकात्मक पुतळे, चित्रे किंवा प्रतिमांचे प्रदर्शन अथवा दहन करण्यास बंदी घालण्यात आली आहे. तसेच समाजात तणाव निर्माण होईल, द्वेष पसरवला जाईल किंवा राज्याच्या सुरक्षिततेला धोका निर्माण होईल अशा प्रकारचे प्रचार साहित्य, संदेश किंवा वक्तव्ये प्रसारित करण्यासही मनाई करण्यात आली आहे.
पोलीस प्रशासनाच्या माहितीनुसार, कायदा व सुव्यवस्थेचा प्रश्न निर्माण होण्याची शक्यता लक्षात घेऊन हे आदेश जारी करण्यात आले आहेत.
दरम्यान, शासन सेवेत कार्यरत अधिकारी तसेच अधिकृत कर्तव्यासाठी शस्त्र बाळगण्याची परवानगी असलेल्या व्यक्तींना या आदेशातून सूट देण्यात आली आहे. कायदेशीर मान्यता प्राप्त सुरक्षा यंत्रणांनाही या नियमांचा अपवाद लागू राहणार आहे.
आदेशाचे उल्लंघन करणाऱ्यांवर महाराष्ट्र पोलीस अधिनियम १९५१ च्या कलम १३५ अंतर्गत गुन्हा दाखल करण्यात येणार असून कठोर कारवाई केली जाईल, असा इशारा पोलीस प्रशासनाने दिला आहे.
शहरातील शांतता, सुरक्षितता आणि सामाजिक वातावरण अबाधित राखण्यासाठी नागरिकांनी प्रशासनाला सहकार्य करावे, असे आवाहन पिंपरी-चिंचवड पोलीस आयुक्तालयाच्या वतीने करण्यात आले आहे.
