पुण्यातील ताडीवाला रोड परिसरात एकतर्फी प्रेमातून झालेल्या संतापजनक हल्ल्याने शहर हादरले आहे. २१ वर्षीय तरुणी आणि तिच्या मित्रावर ॲसिडसदृश ज्वलनशील रसायन फेकून जीवघेणा हल्ला करण्यात आल्याची धक्कादायक घटना उघडकीस आली आहे. या प्रकरणातील मुख्य आरोपी श्रीराम मधु सरनवर (वय २०) याला पुणे पोलिसांनी अवघ्या २४ तासांत कर्नाटकातून अटक केली आहे. हल्ल्यात जखमी झालेल्या दोघांवर शासकीय रुग्णालयात उपचार सुरू आहेत.
पोलिसांच्या प्राथमिक तपासानुसार, पीडित तरुणी आणि तिचा मित्र पुण्यातील एका हॉटेलमध्ये एकत्र काम करत असून ताडीवाला रोड परिसरात लिव्ह-इन रिलेशनशिपमध्ये राहत होते. तरुणीने आपल्यासोबत न राहता दुसऱ्या तरुणासोबत राहण्याचा निर्णय घेतल्याने आरोपीच्या मनात तीव्र राग निर्माण झाला होता.
२० मे रोजी पहाटे सुमारे दोनच्या सुमारास, काम आटोपून दोघे पायी घरी जात असताना आरोपीने ताडीवाला रोड परिसरात त्यांचा पाठलाग करत त्यांना अडवले. सुरुवातीला वाद घालत आरोपीने अचानक आपल्या जवळील तीव्र रासायनिक पदार्थ तरुणीच्या अंगावर फेकला. या भीषण हल्ल्यात तरुणीच्या मानेवर, पाठीवर आणि दोन्ही पायांवर गंभीर भाजल्याच्या जखमा झाल्या. तिच्या मित्रालाही दुखापत झाली असून त्याच्या पायाला इजा झाल्याचे समोर आले आहे.
हल्ल्यानंतर आरोपी घटनास्थळावरून फरार झाला होता. मात्र, घटनेचे गांभीर्य लक्षात घेऊन पुणे गुन्हे शाखा आणि बंडगार्डन पोलिसांनी तातडीने तपास सुरू केला. पोलिसांच्या विशेष पथकाने कर्नाटक रेल्वे पोलिसांच्या मदतीने हुबळी रेल्वे स्थानकावर सापळा रचत आरोपीला ताब्यात घेतले.
या घटनेमुळे पुणे शहरातील महिलांच्या सुरक्षेचा मुद्दा पुन्हा ऐरणीवर आला असून नागरिकांकडून संताप व्यक्त केला जात आहे.
