भोसरी प्रतिनिधी. दि. १७ जून : एमआयडीसी भोसरी परिसरातील औद्योगिक मालमत्तेच्या तब्बल पाच कोटी रुपयांच्या व्यवहारात फसवणूक, दमदाटी तसेच शिवीगाळ केल्याचा आरोप करत दोन जणांविरुद्ध एमआयडीसी भोसरी पोलीस ठाण्यात गुन्हा दाखल करण्यात आला आहे.
याप्रकरणी छाया मधुकर कोकरे (वय ५०, रा. हनुमाननगर, भगत वस्ती, भोसरी) यांनी फिर्याद दाखल केली आहे. त्यानुसार हरबनसिंग जब्बल (वय ७७) आणि जसविंदर कौर जब्बल (वय ७४, रा. निगडी प्राधिकरण) यांच्याविरोधात भारतीय न्याय संहिता (बीएनएस) कलम ३१८(४), ३५२, ३५१(२) आणि ३(५) अंतर्गत गुन्हा नोंदविण्यात आला आहे.
पोलिसांनी दिलेल्या माहितीनुसार, आरोपींच्या मालकीची एमआयडीसी भोसरी येथील जे-ब्लॉकमधील १४२८ चौरस मीटर क्षेत्रफळाची औद्योगिक जागा व त्यावरील इमारत वर्ष २०२२ मध्ये पाच कोटी रुपयांना विक्री करण्याचे निश्चित झाले होते. त्यासाठी विसार पावतीही करण्यात आली होती. या व्यवहाराच्या अनुषंगाने फिर्यादींकडून आरोपींना वेळोवेळी तब्बल २ कोटी ४५ लाख रुपयांची रक्कम अदा करण्यात आली होती.
दरम्यान, संबंधित मालमत्ता अन्य व्यक्तीस विक्री करण्यासाठी जाहीर नोटीस प्रसिद्ध झाल्याचे समोर आल्यानंतर फिर्यादींना संशय आला. त्यानंतर दोन्ही पक्षांमध्ये नव्याने सहा कोटी रुपयांचा व्यवहार निश्चित करण्यात आला. सप्टेंबर २०२४ मध्ये खरेदी दस्ताची प्रक्रिया सुरू करण्यात आली असून, या व्यवहारासाठी फिर्यादींनी एकूण २ कोटी ९५ लाख ५ हजार रुपये दिल्याचा दावा केला आहे.
फिर्यादींच्या म्हणण्यानुसार, उर्वरित रक्कम डिमांड ड्राफ्टच्या माध्यमातून अदा करण्याचा प्रयत्न करण्यात आला. मात्र आरोपींनी आपले बँक खाते तात्पुरते बंद करून व्यवहार पूर्ण होण्यास अडथळा निर्माण केला. तसेच खरेदीखत पूर्ण करण्यास टाळाटाळ करत फिर्यादी, त्यांचे वकील आणि निबंधक कार्यालयातील कर्मचाऱ्यांविरोधात खोट्या तक्रारी दाखल केल्याचाही आरोप करण्यात आला आहे.
याशिवाय व्यवहाराबाबत वारंवार विचारणा केल्यावर आरोपींकडून दमदाटी व शिवीगाळ करण्यात आल्याचे फिर्यादीत नमूद करण्यात आले आहे. या प्रकरणाचा पुढील तपास एमआयडीसी भोसरी पोलीस ठाण्याचे अधिकारी करीत आहेत.
